Si Jorge Vargas ay nawili sa mga bagay. Ang kanyang masidhing damdamin hinggil sa pagtitipon ay naudyukan at napanatili dahil sa masigasig na interes sa pira-pirasong kultura ng Pilipinas bilang isang pamanang pambansang kolektibo. Ang konseptong ito ng Filipiniana ay ang pangunahing pulso sa pag-alam at pangtangi sa buhay panlipunan ng bayan at sa proseso ng pagkakabuo nito. Ang eksibisyong ito ay nagtatanghal ng tatlong nagsasalikop na tema sa mga gawi ng pagtitipon ni Vargas, umiinog sa kanyang loobin tungo sa mga bagay na siyang humubog sa koleksyon: Kawilihan, Kasaysayan, at Kasanayan.

     Tinutirol sa Kawilihan ang personal na buhay ni Vargas bilang isang taong lubos na nakaugat sa kanyang tahanan at pamilya, isang tagapagtaguyod ng iba't-ibang larangan ng masining na gawain. Ang mga larawan at souvenir tulad ng masining na gawain. Ang mga kahon ng posporo ay nagtataglay ng mga alaala ng kanyang mga paglalakbay at pang-araw-araw na pakikisalamuha sa mga tao at luagr. Ang pagpapasya sa pagkakatuto ay mahihimlay sa mga aklat na kanyang tinipon at mga eksibisyong kanyang dinaluhan. Ang mayamang koleksyon ay yumabong at lumalim sa paglipas ng panahon ng Komonwelt, kasagsagan ng digmaan sa Pasipiko, at mga taon ng pananakop ng Hapon. Siya ay naging masigasig na tagasinop ng mga talaan, isang tagatipon ng mga ephemera, at isang kilalang tao sa larangan ng pulitika. Samakatuwid, siya ay mainam na nakaposisyon upang magpanukala, sa pamamagitan ng koleksyon, ng isang partikular na antas ng pagkakaugnay-ugnay at malinang ang pambansang mithiin sa gitna ng pagguho, pagtawid, at pagbanyuhay. Ang mga larawan, dokumento, at iba pang mga kagamitan ay nagpapatunay sa mga pagsisikap na ito upang mapanindigan ang mga ideyolohiya sa ngalan ng kulturang Filipino at ang kasarinlan nito. Si Vargas ay naguna sa pagsulong ng palakasan, pag-iiskawt, at mga gawaing pang-kawanggawa, na siyang nagpaganap sa kanyang pag-iral sa publiko.

     Ipinahatid sa Kasanayan ang kagalingan ng kapwa isip at katawan. Ang paghahasa sa dunong at pisikal na talino ang siyang bumuo sa ilang hangarin ni Vargas mula pa sa kanyang pag-aaral ng kolehiyo sa Unibersidad ng Pilipinas hanggang sa kanyang mga gawain sa mga organisasyon sa mas malawa na lipunan. Ang mga likhang sining, artepakto, mementos, at iba pang mga bagay ay nagpapahiwatig ng ugnayan sa pagitan ng tao at ng kanyang mga damdamin sa patuloy na pagsisikap na maging mataman sa anumang adhika na maisakatuparan ang mga malikhaing potensyal ng tao, na maging mabuti sa katawan at kalooban.